పోలవరంతోపాటు ప్రాణహిత-చేవెళ్లకు జాతీయ హోదా: జగన్ డిమాండ్
7న ప్రారంభం కానున్న యువనేత పాదయాత్ర... 9న పోలవరంలో బహిరంగ సభ
మెట్ట ప్రాంతాల్లోనూ పాదయాత్ర చేపట్టాలని అభ్యర్థనలు.. ఈ నేపథ్యంలో ఆదివారం ఖరారు కానున్న షెడ్యూలు... వివరాలు వెల్లడించిన మాజీ మంత్రి బోస్
బహుళార్థ సాధక ప్రాజెక్టు పోలవరంతోపాటు ప్రాణహిత-చేవెళ్లకు జాతీయ హోదా కల్పించాలన్న డిమాండ్‌తో వచ్చేనెల 7 నుంచి యువనేత వైఎస్ జగన్మోహన్రెడ్డి పాదయాత్ర నిర్వహించనున్నారని మాజీ మంత్రి, రామచంద్రపురం ఎమ్మెల్యే పిల్లి సుభాష్‌చంద్రబోస్ వెల్లడించారు. శుక్రవారం ఇక్కడి సీఆర్సీ ఓల్డేజ్ హోమ్‌లో ఆయన విలేకరుల సమావేశంలో మాట్లాడారు. యువనేత పాదయాత్ర షెడ్యూల్ వివరించారు. యాత్ర 7న రావులపాలెంలో ప్రారంభమవుతుందని, 9వ తేదీన పోలవరంలో ముగుస్తుందని, అనంతరం అక్కడ బహిరంగ సభ జరుగుతుందని బోస్ వివరించారు. 70 కిలోమీటర్ల మేర మూడ్రోజులపాటు ఈ పాదయాత్ర సాగుతుందన్నారు. అయితే ఈ ప్రాజెక్టు వల్ల మెట్ట ప్రాంతాలకు అధిక ప్రయోజనం కలుగనున్న నేపథ్యంలో ఆ ప్రాంతాల్లో కూడా పాదయాత్ర జరపాలని అభ్యర్థనలు వస్తున్నాయని అన్నారు. దీనిపై చర్చించేందుకు ఆదివారం ముఖ్యులతో సమావేశమై యాత్ర తాలూకు తుది షెడ్యూలు ఖరారు చేస్తామని సుభాష్ చంద్రబోస్ శుక్రవారం రాత్రి ‘న్యూస్‌లైన్’కు తెలిపారు. పోలవరం ప్రాజెక్టు పూర్తయితే తూర్పు, పశ్చిమ గోదావరి జిల్లాలతో పాటు విశాఖ, విజయనగరం, శ్రీకాకుళం, కృష్ణా డెల్టా, రాయలసీమ, తెలంగాణ ప్రాంతాలకు మేలు జరుగుతుందని బోస్ పేర్కొన్నారు.
ఉభయ గోదావరి జిల్లాల్లోని 10.20 లక్షల ఎకరాలు సాగులోకి రావడంతోపాటు వైఎస్ఆర్ హయాంలో ప్రారంభించిన ఎల్లంపల్లి, దుమ్ముగూడెం తదితర ఏడు లిఫ్ట్ ఇరిగేషన్ ప్రాజెక్టులకు అవసరైమైన 69 టీఎంసీల నీరు అందుతుందన్నారు. ఆగస్టు, సెప్టెంబర్ నెలల్లో ధవళేశ్వరం బ్యారేజ్‌కు 78 టీఎంసీల ఇన్‌ఫ్లో వస్తుందన్నారు. పోలవరం పూర్తి కాకుంటే ఉభయ గోదావరి జిల్లాల రైతులకు మొదటి పంట కూడా పండించుకోలేని ప్రమాదం పొంచి ఉందని బోస్ తెలిపారు. ధవళేశ్వరం బ్యారేజ్ పరిధిలో సాగుభూమి పూర్తిగా వినియోగంలోకి రావాలంటే బ్యాలెన్సింగ్ రిజర్వాయర్‌ను నిర్మించాల్సిందిగా సర్ ఆర్థర్ కాటన్ గతంలోనే సూచించారని బోస్ గుర్తు చేశారు. ఇవన్నీ పరిగణలోకి తీసుకున్న దివంగత నేత వైఎస్ పోలవరానికి శ్రీకారం చుట్టారన్నారు. ఆయన హయాంలో పూర్తయిన 35 శాతం పనులు తప్ప పోలవరం ప్రాజెక్టు ముందుకు సాగడం లేదని బోస్ విమర్శించారు. వివిధ శాఖలకు చెందిన 17 రకాల అనుమతులతోపాటు ఒరిస్సా, ఛత్తీస్‌గఢ్ అనుమతి ఉన్నా పోలవరానికి జాతీయ హోదా ప్రకటించకుండా కేంద్రం నిరంకుశత్వంగా వ్యవహరిస్తోందని దుయ్యబట్టారు. వైఎస్ బతికుండగా ఒరిస్సా, ఛత్తీస్‌గఢ్ రాష్ట్రాలతో ముంపు సమస్య పరిష్కారానికి రాష్ట్ర ప్రభుత్వం అవగాహన చేసుకున్నా, కేంద్రం రోజుకో కొర్రీ వేస్తూ కాలయాపన చేస్తోందన్నారు.
పోలవరం పూర్తయితే ఐదు జిల్లాల్లో సుమారు 22.70 లక్షల ఎకరాలకు సమృద్ధిగా సాగునీరు అందుతుందని, 80 టీఎంసీల నీరు కృష్ణాకు మళ్లించే అవకాశం ఉంటుందని బోస్ వివరించారు. దీంతో కృష్ణా డెల్టా ఆయకట్టు స్థిరీకరించడంతో పాటు శ్రీశైలం ప్రాజెక్టు ద్వారా రాయలసీమ, తెలంగాణకు మరింత నీరు అందించవచ్చని తెలిపారు. అంతేకాకుండా 960 మెగావాట్ల విద్యుత్ ఉత్పత్తి, 520 గ్రామాలకు తాగునీటి అవసరాలు, ఏలేరు ఆయకట్టుకు పుష్కలంగా నీరు వంటి ఎన్నో ప్రయోజనాలున్నాయన్నారు. పోలవరానికి జాతీయ హోదా కల్పిస్తే ఐదేళ్లలో ప్రాజెక్టు పూర్తయ్యే అవకాశం ఉందని, ప్రతి ఒక్కరూ ఇందుకోసం నడుం బిగించాలని బోస్ పిలుపునిచ్చారు. పోలవరం ప్రాజెక్టు ప్రారంభ సమయంలో పుష్కర ఎత్తిపోతల పథకం అవసరం లేదని ఎందరో నిపుణులు సూచించినా వైఎస్.. వెనుకడుగు వేయలేదన్నారు. మరో రూ. 168 కోట్లు మంజూరు చేస్తే పుష్కర పనులు పూర్తయ్యే అవకాశం ఉన్నా.. రాష్ట్ర ప్రభుత్వం పట్టించుకోవడం లేదన్నారు. ఉభయ గోదావరి జిల్లాల రైతుల ఆందోళనను గుర్తించిన జగన్ పాదయాత్ర చే యాలన్న నిర్ణయం తీసుకున్నారని, పార్టీలకు అతీతంగా ప్రతి ఒక్కరూ ఈ పాదయాత్రలో పాల్గొని యువనేతకు మద్దతు తెలపాలని విజ్ఞప్తి చేశారు. విలేకరుల సమావేశంలో మాజీ ఎమ్మెల్యే చిర్ల జగ్గిరెడ్డి, వెదిరేశ్వరం సర్పంచ్ బొక్కా వెంకటలక్ష్మి,రావులపాలెం నీటి సంఘం అధ్యక్షుడు గొలుగూరి మునిరెడ్డి, రావులపాలెం కాంగ్రెస్ మైనార్టీసెల్ అధ్యక్షుడు మన్యం భాను, సీఆర్సీ అధ్యక్షుడు మల్లిడి కనికిరెడ్డి, సీఆర్సీ మెంబర్ కర్రి సత్తిరెడ్డి, జిల్లా యువజన కాంగ్రెస్ ఉపాధ్యక్షుడు కోపెల్ల మల్లి, సీఆర్సీ మాజీ అధ్యక్షుడు ద్వారంపూడి వెంకటరెడ్డి, నియోజకవర్గ కాంగ్రెస్ ప్రచార కార్యదర్శి కముజు సత్యనారాయణ, ఆర్‌వీవీ సత్యనారాయణచౌదరి, నీరజారాణి తదితరులు పాల్గొన్నారు.
యువనేత వైఎస్ జగన్‌మోహన్‌రెడ్డితో కాంగ్రెస్ అధిష్టానం రాయబారం నడుపుతోందని తాను అన్నట్టుగా వచ్చిన వార్తల్లో వాస్తవం లేదని అనకాపల్లి ఎంపీ సబ్బం హరి స్పష్టంచేశారు. కాంగ్రెస్ అధిష్టానం జగన్‌తో రాజీకి ప్రయత్నిస్తుందన్న చర్చను గాని, ఆ ఊహను గాని జగన్‌తోపాటు ఆయన అనుచరులెవ్వరూ భరించే స్థితిలో లేరనే తాను చెప్పినట్లు బుధవారం వివరించారు. తన వ్యాఖ్యలను గోరంతలు కొండంతలు చేసి చూపిస్తున్నారని ఆరోపించారు. తన వ్యాఖ్యలను జగన్‌కు ఇబ్బంది కలిగించేలా ఆపాదించడం, లేనిపోనివి ప్రచారం చేయడం మంచిది కాదని హితవు పలికారు. తన తండ్రి కోసం చనిపోయిన వారి కుటుంబాలను పరామర్శించాలన్న మంచి ఉద్దేశంతో చేపట్టిన ఓదార్పుయాత్రను చులకన చేసినప్పుడే జగన్ కాంగ్రెస్ పార్టీ గురించి మర్చిపోయారని ఆయన చెప్పారు. 
ఇంతటి అవకాశవాద రాజకీయాలను ఎన్నడూ చూడలేదు... నిన్నటివరకు కత్తులు దూసుకున్న వారే నేడు చాటుగా కౌగిలించుకుంటున్నారు... రాజకీయ శత్రుత్వాన్ని మరచి ఏకమవుతున్నారు... వ్యక్తిగత ప్రయోజనాల కోసం పార్టీల ప్రయోజనాలను సైతం పణంగా పెడుతున్నారు... జనబలం ఉన్న నేతను నేరుగా ఎదుర్కొనే చేవలేక కుయుక్తులు పన్నుతున్నారు... ప్రత్యర్థులమన్న సోయికూడా మరచి కుట్రలు చేస్తున్నారు... రాష్ట్ర చరిత్రలో మునుపెన్నడూ చూడని రాజకీయాలివి... ఇవీ రాష్ట్రంలోని ఆయా రాజకీయ పార్టీల్లోని పలువురు నేతల ప్రైవేటు సంభాషణల్లో వినిపిస్తున్న వ్యాఖ్యలు. రాష్ట్రంలో ప్రభుత్వానికి ఎప్పుడేం గండం వస్తుందోననే భయంతో ఏఐసీసీ అధినేత్రి సోనియాగాంధీ ప్రజారాజ్యం పార్టీ అధ్యక్షుడు చిరంజీవిని ఢిల్లీ పిలిపించుకుని మంతనాలు జరిపిన రోజునుంచి రాష్ట్ర రాజకీయాల ముఖచిత్రం మారిపోయిందనే అభిప్రాయాలు వ్యక్తం చేస్తున్నారు. 
ఎన్నికల్లో మహానేత వైఎస్సార్ ముఖం చూసే జనం ఓట్లేశారని, సోనియాను చూసి కాదని మాజీ మంత్రి కొణతాల రామకృష్ణ అన్నారు. శనివారం ‘జనదీక్ష’ వేదికపై ఆయన మాట్లాడుతూ.. 2004, 2009 ఎన్నికల్లో గత్యంతరం లేని పరిస్థితుల్లోనే అధిష్టానం వైఎస్‌ను ముఖ్యమంత్రిని చేసింది తప్ప.. ఆయనపై అభిమానంతో కాదని చెప్పారు. ‘2003లో వైఎస్ పాదయాత్ర చేసినప్పుడు రాజమండ్రిలో అస్వస్థతకు గురయ్యారు. ఆ సమయంలో ఒడిశా పర్యటనకు వెళ్తున్న సోనియాగాంధీ విశాఖ విమానాశ్రయంలో ట్రాన్సిట్ హాల్టు చేశారు. ఆ సందర్భంలో వైఎస్‌ను ఫోన్లో పరామర్శించాలని నేను కోరగా.. ఆమె అందుకు నిరాకరించారు. నేనేమైనా ఆయన్ను పాదయాత్ర చేయమన్నానా? ఆయనిష్టం. దాని పర్యవసానం ఆయనే అనుభవిస్తాడు. నేను మాట్లాడనన్నారు. ఆ మాటలకు తీవ్ర మనోవేదనకు గురైన నేను ఆ రోజు నుంచి సోనియాను కలవడం మానేశాను. దీనికి మాజీ సీఎం రోశయ్యే సాక్షి’ అని నాటి ఘటనను గుర్తు చేసుకున్నారు. 
కాంగ్రెస్‌కు వైఎస్ కుటుంబం రుణపడి ఉండాలని సీఎం కిరణ్‌కుమార్‌రెడ్డి అన్నారట. నిజానికి రాష్ట్రంలో గాని, కేంద్రంలో గాని కాంగ్రెస్ ప్రభుత్వం అధికారం చేపట్టిందంటే అది వైఎస్ వల్లే. ఈ మాట కేంద్రమంత్రి ప్రణబ్ ముఖర్జీయే స్వయంగా చెప్పారు. ఆంధ్రప్రదేశ్ నుంచి 33 ఎంపీ సీట్లను ఇవ్వడం వల్ల ఈ రోజు నేను కేంద్రమంతిగా ఉన్నానని ఆయన చెప్పారు. కేవలం వైఎస్ వల్లే ఇన్ని సీట్లు వచ్చాయి. అందువల్లే కేంద్రంలో కాంగ్రెస్ ప్రభుత్వం ఏర్పడింది. అందుకు కాంగ్రెస్సే వైఎస్‌కు, ఆయన కుటుంబానికి రుణపడి ఉండాలి. 2009 ఎన్నికలయ్యాకే జగన్ పార్లమెంటు సెంట్రల్ హాలులో పరిచయమయ్యారు. అంతకు ముందు పరిచయం లేదు. కొందరు హద్దులు మీరి మాట్లాడుతున్నారు. 
జగన్‌ను వేధించి, మనోవేదనకు గురిచేశారు. పార్టీ నుంచి బయటకు వెళ్లేలా చేశారు. వైఎస్ మరణానంతరం ఆయన్ను సీఎం చేయాలని 150 మంది ఎమ్మెల్యేలతో సంతకాలు చేయించారు. తర్వాత దానినీ వక్రీకరించారు. జగన్‌ను కాదని రోశయ్యను సీఎం చేశారు. ఏడాది తర్వాత ఆయన్ను మార్చి కిరణ్‌కుమార్‌రెడ్డిని ముఖ్యమంత్రిని చేశారు. వైఎస్ పుణ్యాన రాష్ట్రంలో అధికారం వస్తే ఆయన మరణించాక వేరే వారికి సీఎం పదవులను కట్టబెట్టారు. ఇప్పుడు వారంతా నైతిక విలువల గురించి మాట్లాడుతున్నారు. నైతిక విలువలకు నిర్వచనం చెప్పగలరా? గుట్టుగా ఉండకుండా రచ్చ చేసుకుంటున్నారు. రేపోమాపో పడిపోయే స్థితిలో ఉన్నారు. మీది మైనార్టీ ప్రభుత్వం కాదా? నాయకత్వ లోపం వల్లే రాష్ట్రంలో దుర్భర పరిస్థితులేర్పడ్డాయి. వైఎస్ వుంటే రాష్ట్రంలో ఈ పరిస్థితులొచ్చేవి కావు. రేపటి తరానికి ఓ గొప్ప నాయకుడు (జగన్) దొరికాడు. ప్రాంతాలకతీతంగా తెలుగు ప్రజల ఆత్మగౌరవాన్ని కాపాడటానికి పూనుకున్నాడు. రాష్ట్రంలోనే కాదు దేశ రాజకీయాలనే శాసించబోతున్నాడు. కేంద్రంలో కాంగ్రెస్ ప్రభుత్వం వస్తే మేలు జరుగుతుందని ప్రజలు ఎన్నో ఆశలు పెట్టుకుంటే వారి బతుకును దుర్భరం చేశారు. 
పూర్వం వారసుల్లేని రాజు మరణిస్తే ఏనుగుకు పూలదండను అందించి వీధుల్లోకి వదిలేవారు. అది ఎవరి మెడలో దండ వేస్తే వారికే రాజ్యాధికారం. అధిష్టానం అనే ఏనుగు వేసిన దండతో సీఎం అయిన కిరణ్ కుమార్‌రెడ్డికి నైతిక విలువల గురించి మాట్లాడే హక్కు లేదు. దమ్ముంటే మళ్లీ పోటీ చేసి గెలవాలి. ధరల పెరుగుదలతో సామాన్యులు ఎదుర్కొంటున్న కష్టాలపై స్పందిస్తూ జగన్మోహన్రెడ్డి ఉద్యమించారు. మేం పార్టీ పెట్టాక కూడా ప్రజా సమస్యలపై ఉద్యమాలు కొనసాగుతాయి. 
జగన్ వెంట 35 మంది ఎమ్మెల్యేలం ఉన్నాం. ఏ క్షణాన్నైనా రాజీనామాకు సిద్ధమే. వైఎస్సార్ బొమ్మతో గెలిచిన ఆ నేతలకు మాట్లాడే అర్హత లేదు. మీరు కూడా రాజీనామా చేసి రండి. ప్రజలు ఏం తీర్పిస్తారో చూద్దాం. వైఎస్సార్‌కు ప్రజల బాధలు తెలుసు. ప్రజలకు భారమయ్యే ఏ చర్యనూ ఆయన ఉపేక్షించేవారు కాదు. ఇప్పుడు నేతలు ఢిల్లీలో ఊకదంపుడు సమావేశాలు పెట్టడం తప్ప ప్రజలకు చేసిందేమీ లేదు. 
ప్రజలే జగన్‌ను ముఖ్యమంత్రిని చేస్తారు. జగన్‌కు వేరే అధిష్టానం లేదు. ప్రజలే ఆయనకు అధిష్టానం. వైఎస్ పథకాలను రాష్ట్రంలో ప్రతి ఒక్కరూ అంతో ఇంతో అనుభవించారు. సొంతంగా పట్టుమని పది ఓట్లులేని కొందరు పెద్దలు కాంగ్రెస్ పార్టీని భ్రష్టు పట్టించారు. వైఎస్సార్ పట్ల ప్రజలకు అమితమైన ప్రేమ ఉంది. సోనియమ్మ, రాహుల్‌ను చూసి రాష్ట్ర ప్రజలు ఓట్లేయలేదు. వైఎస్సార్ బొమ్మతోనే రాష్ట్రంలో కాంగ్రెస్ అధికారంలోకి వచ్చింది. కాదనే నేతలు రాజీనామా చేసి సోనియా బొమ్మతో పోటీ చేయండి.. మేం వైఎస్సార్ బొమ్మపెట్టుకుని ప్రజల్లోకి వెళతాం. దేవాలయాల్లో దేవుడు.. ప్రజల గుండెల్లో వైఎస్సార్ ఎప్పటికీ నిలిచే ఉంటారు.
ఈ ప్రభుత్వం దివంగత వైఎస్ పెట్టిన భిక్ష. నాన్న తెచ్చిన ప్రభుత్వాన్ని కూల్చొద్దన్న జగన్ మాట మేరకు నేను రాజీనామా చేయలేదు. ఆయన సరేనంటే ఈ క్షణమే రాజీనామా చేసి, ఫ్యాక్స్ ద్వారా ప్రభుత్వానికి పంపుతా. నైతిక విలువలు గురించే మాట్లాడే సీఎం తన అనుయాయులతో రాజీనామా చేయించి, ఎన్నికలకు వెళ్లాలి. ప్రజలు ఎవరికి పట్టం కడతారో తేలిపోతుంది. పేదలు ధరాఘాతంతో తల్లడిల్లుతోంటే ఈ ప్రభుత్వం నీరోలా వ్యవహరిస్తోంది.
ఈ ప్రభుత్వం పూర్తి కాలం కొనసాగేది అనుమానమే. నిత్యావసరాలు, పెట్రో మంటతో ప్రజల పరిస్థితి దుర్భరంగా మారింది. దివంగత నేత వైఎస్సార్‌లా ఎవరూ పేద, బడుగు, బలహీన వర్గాలపై దృష్టి పెట్టింది లేదు. 30 మంది ఎస్సీలు ఎమ్మెల్యేలు కావడం వైఎస్సార్ చలవే. ఆయన వారసుడు జగన్ వెంట ఉండటమే నైతికత. ఆయన ఊ అంటే ఈ క్షణాన్నైనా రాజీనామా చేసేందుకు సిద్ధమే. 
