రైతు దీక్ష డిమాండ్లివీ..
రైతు దీక్ష ప్రధాన డిమాండ్లను దీక్ష వేదికపై ఎమ్మెల్యే కొండా సురేఖ ప్రకటించారు. అవి..
* పసుపు, చెరుకు, మిరప, వరి, పత్తి పంటలకు గిట్టుబాటు ధరలు లేక రైతులు నష్టపోతున్నారు. వారికి గిట్టుబాటయ్యే మద్దతు ధర కల్పించేందుకు రూ.3 వేల కోట్లతో తక్షణమే ధరల స్థిరీకరణ నిధిని ఏర్పాటు చేయాలి. అన్ని పంటలకు గిట్టుబాటు, మద్దతు ధర కల్పిస్తూ ప్రభుత్వం కొనుగోలు చేయాలి.
* వైఎస్ ప్రకటించిన 9 గంటల ఉచిత విద్యుత్ హామీని అమలు చేయని ఈ ప్రభుత్వం.. ప్రస్తుత ఏడు గంటల కరెంటులోనే ఎడాపెడా కోతలు విధిస్తోంది. కాంగ్రెస్ పార్టీ ఎన్నికల మ్యానిఫెస్టోలో హామీ ఇచ్చిన మేరకు నాణ్యమైన విద్యుత్తును తొమ్మిది గంటల పాటు నిరంతరాయంగా, ఉచితంగా సరఫరా చేయాలి.
* రాష్ట్ర ప్రభుత్వం కరువు ప్రాంతాలుగా ప్రకటించిన 800 పైచిలుకు మండలాల్లో రైతులకు పైసా సాయం అందించలేదు. తక్షణమే రైతులకు సహాయాన్ని అందించేందుకు చర్యలు చేపట్టాలి.
రైతులను విస్మరిం చి నిద్రపోతున్న ఈ ప్రభుత్వాన్ని, దానిని నడిపిస్తున్న ఢిల్లీ సర్కారును ఈ ‘రైతు దీక్ష’ ద్వారా మేల్కొలుపుదామని వైఎస్సార్ కాంగ్రెస్ పార్టీ అధ్యక్షుడు వైఎస్ జగన్‌మోహన్‌రెడ్డి.. అన్నదాతలకు పిలుపునిచ్చారు. మంగళవారం నిజామాబాద్ జిల్లా ఆర్మూరు మం డలం పెర్కిట్ శివారులోని వైఎస్‌ఆర్ ప్రాంగణంలో ‘రైతు దీక్ష’ను ప్రారంభించే ముందు ఆయన క్లుప్తంగా మాట్లాడారు. కొండెక్కిన ఎరువుల రేట్లు, కరెంటు కోతలు, కనీస మద్దతు ధర అందక అన్నదాత కుచేలుడైపోయిన నేపథ్యంలో.. ఆ రైతన్న కన్నీళ్లను ప్రభుత్వ పెద్దల దృష్టికి తీసుకెళ్లేందుకు జగన్ ఈ దీక్ష చేపట్టారు. ఇది మధ్యాహ్నం 12 గంటలకే ప్రారంభం కావాల్సి ఉండగా.. రాత్రి 8.00కుగానీ ఆయన అక్కడకు చేరుకోలేకపోయారు. హైదరాబాద్‌లో ఉదయం బయల్దేరింది మొదలు ప్రతి బాట లోనూ అభిమాన ప్రవాహం ఉప్పొంగడం.. రోడ్లన్నీ జనసంద్రాన్ని తలపించడం.. జెండా ఆవిష్కరణలు, పార్టీలో చేరికలు, మంగళహారతులు, కరచాలనాలు, పూలమాలలతో అభిమానులు ఉరకలెత్తడంతో ఆయన ఇక్కడకు చేరుకోవడం ఎనిమిది గంటల ఆలస్యమైంది. ఇంత ఆలస్యమైనా ఉదయం నుంచే అక్కడ వేయి కళ్లతో ఎదురుచూస్తున్న వేలాది మంది ప్రజల్లో విసుగుగాని, అలుపుగాని కనిపించలేదు. ఉదయం నుంచీ జై జగన్, జోహార్ వైఎస్సార్ అన్న నినాదాలు ఆ ప్రాంగణమంతా మార్మోగుతూనే ఉన్నాయి. జగన్ రాకతో అవి మిన్నంటాయి. కిటకిటలాడుతున్న జనహోరు మధ్య వేదిక మీదకొచ్చిన జగన్‌మోహన్‌రెడ్డి.. ఈ దీక్ష కోరుతున్న మూడు ప్రధాన డిమాండ్లను ఎమ్మెల్యే కొండా సురేఖ ద్వారా చదివి వినిపించారు. వేదికపై సర్వమత పెద్దల ఆశీస్సులు.. ప్రాంగణంలో అన్నదాత రణన్నినాదాల మధ్య జగన్‌మోహన్‌రెడ్డి నిరాహార దీక్ష ప్రారంభించారు. దీనికి ముందు ఆయన క్లుప్తంగా ప్రసంగించారు.
మరొక్కసారి మేల్కొలిపే ప్రయత్నమే..
‘‘రైతుల సమస్యల మీద ఎన్నో దీక్షలు చేశాం.. కలెక్టరేట్లను, ఎమ్మార్వో కార్యాలయాలను ముట్టడించాం.. నియోజకవర్గాలు, మండలాల్లో దీక్షలు చేపట్టాం.. గత రెండేళ్లుగా దీక్షల మీద దీక్షలు చేశాం, అయినా రైతుల గోడును ఈ ప్రభుత్వం పట్టించుకోలేదు. మరొక్కసారి రైతుల గోడు గట్టిగా వినిపించి సర్కారును మేల్కొలిపే ప్రయత్నమే ఈ దీక్ష’’ అని జగన్ పేర్కొన్నారు. దీక్ష జరిగే ఈ మూడు రోజుల్లో శిబిరంలో రైతు నాయకులు మాట్లాడతారని.. ‘మా రైతుల గోడు వినండయ్యా’ అంటూ ప్రభుత్వాన్ని నిలదీస్తారని అన్నారు. ఈ ప్రభుత్వం అనుసరిస్తున్న రైతు, పేదల వ్యతిరేక విధానాల మీద ప్రతి ఒక్కరూ గళం విప్పుతారని చెప్పారు. దీక్ష విరమించే సమయంలో రైతాంగ సమస్యలపై తాను సుదీర్ఘంగా మాట్లాడతానన్నారు. ‘మధ్యాహ్నం 12 గంటలకు జరగాల్సిన కార్యక్రమం రాత్రి 8.30కు జరుగుతున్నా ఒక్కరు కూడా ఆలస్యమైపోతోందని ఇంటికెళ్లిపోకుండా.. మరో పనులున్నాయని సాకులు చూపకుండా, చలిని లెక్కచేయకుండా.. ఎవ్వరి ముఖంలోనూ చికాకు కనిపించకుండా వేచి ఉన్నారు. నా కోసం చిన్న పిల్లలతో వేచి ఉన్న తల్లులకు, నడవలేని వయసులోనూ ఇక్కడకు వచ్చిన అవ్వలకు, తాతలకు, అన్నలకు, అక్కా చెల్లెళ్లకు అందరికీ పేరుపేరునాకృతజ్ఞతలు తెలుపుకొంటున్నాను’ అని జగన్ అన్నారు.
కదలి వచ్చిన కర్షకలోకం: రైతుల సమస్యలను రాష్ట్ర ప్రభుత్వం దృష్టికి తీసుకెళ్లడానికి చేపట్టిన ఈ దీక్షకు కర్షక లోకం తరలి వచ్చింది. తమ ఆవేదనకు ప్రతిరూపమై దీక్షకు దిగిన ప్రియతమ నాయకుడిని చూడటానికి ఆదిలాబాద్, కరీంనగర్, నిజామాబాద్ జిల్లాల నుంచి రైతులు ఉదయం ఏడు గంటల నుంచే దీక్ష ప్రాంగణానికి చేరుకున్నారు. దూర ప్రాంతాల నుంచి వచ్చిన ప్రజలు వాహనాల్లో దీక్ష స్థలికి చేరుకున్నారు. ఆర్మూరు చుట్టుపక్కల నియోజకవర్గాల నుంచి వచ్చిన ప్రజలు మధ్యాహ్నానికి దీక్ష శిబిరానికి వచ్చారు. సాయంత్రం నాలుగు గంటలకల్లా శిబిరం కిక్కిరిసిపోయింది. కళాకారుల సాంస్కృతిక కార్యక్రమాలు ప్రజలను అలరించాయి. ఆలస్యంగా జగన్ దీక్ష శిబిరానికి చేరుకున్నా రైతుల్లో నిరుత్సాహం ఏ కోశానా కనిపించలేదు. ఆయన ఎప్పుడెప్పుడు వస్తారా అన్న ఆత్రుతే కనిపించింది. రాత్రి 8 గంటలకు దీక్ష శిబిరానికి చేరుకున్న జగన్‌కు రైతులు, నాయకులు, ప్రజలు ఘన స్వాగతం పలికారు. ఆయన వేదికపైకి చేరుకోగానే జై జగన్, వైఎస్సార్ అమర్ రహే అనే నినాదాలు మారుమోగాయి.
వైఎస్ విగ్రహానికి పూల మాలవేసి..: దీక్ష శిబిరానికి చేరుకోగానే జగన్.. వైఎస్ రాజశేఖరరెడ్డి విగ్రహానికి పూల మాల వేసి నివాళి అర్పించారు. వైఎస్సార్ కాం గ్రెస్ కేంద్ర పాలకమండలి సభ్యుడు బాజిరెడ్డి గోవర్ధన్ మాట్లాడిన అనంతరం బోధన్ నాయకుడు కెప్టెన్ కరుణాకర్‌రెడ్డిని జగన్.. పార్టీ కండువా వేసి ఆహ్వానిం చారు. మాజీ మంత్రి సంతోష్‌రెడ్డి జగన్‌ను కలిశారు. అనంతరం ఎమ్మెల్యే కొండా సురేఖ జగన్‌కు తిలకం దిద్ది దీక్షను ప్రారంభింపజేశారు. ఈ సందర్భంగా హిందూ, ముస్లిం, క్రిస్టియన్ మత పెద్దలు ప్రత్యేక ప్రార్థనలు నిర్వహించారు.
ఆత్మహత్య చేసుకున్న అన్నదాతలకు శ్రద్ధాంజలి
ఆత్మహత్యలు చేసుకున్న రైతులకు, తెలంగాణ అమరవీరులకు రైతు దీక్షలో శ్రద్ధాంజలి ఘటించారు. వారి ఆత్మ శాంతి కోరుతూ రెండు నిమిషాల పాటు మౌనం పాటించారు. గిట్టుబాటు ధర ఇవ్వని ప్రభుత్వ రైతు వ్యతిరేక విధానాల వల్ల అనేక మంది రైతులు బలయ్యారని, తెలంగాణ కోసం వందలాది మంది ప్రాణాలు అర్పించారని సంతాపం తెలిపారు.
తరలి వచ్చిన నేతలు: దీక్ష శిబిరంలో ఎంపీ మేకపాటి రాజమోహన్‌రెడ్డి, ఎమ్మెల్యేలు శోభా నాగిరెడ్డి, కొండా సురేఖ, ఎమ్మెల్సీలు కొండా మురళి, జూపూడి ప్రభాకర్‌రావు, పార్టీ అధికార ప్రతినిధులు గట్టు రామచంద్రరావు, వాసిరెడ్డి పద్మ, మాజీ మంత్రులు బోడ జనార్ధన్, మారెప్ప, సినీ నటి రోజా, నేతలు జనక్ ప్రసాద్, చందా లింగయ్య, వెంకటరమణారెడ్డి, నిరంజన్‌రెడ్డి, ఆది శ్రీనివాస్, సోమిరెడ్డి, బట్టి జగపతి, రాఘవరెడ్డి తదితరులు పాల్గొన్నారు.
రైతులను కాంగ్రెస్ మోసగిస్తోంది
కాంగ్రెస్ ప్రభుత్వం రాష్ట్రంలోని రైతులను మోసం చేస్తోంది. రైతుల పేరు చెప్పి అధికారంలోకి వచ్చి ఇప్పుడు వారి కష్టాలను గాలికి వదిలేసింది. కేంద్రంలో, రాష్ట్రంలో అధికారంలో ఉన్న కాంగ్రెస్ రైతులకోసం ఏమీ చేయడం లేదు. అందుకే రైతుల పక్షాన నిలిచిన వైఎస్ జగన్‌మోహన్‌రెడ్డి దీక్ష చేపట్టారు.
- మాజీ మంత్రి బోడ జనార్దన్
సంక్షేమమే లక్ష్యంగా..
ప్రాంతాలు, మతాలు, కులాలకు అతీతంగా ప్రజల సంక్షేమంకోసం జగన్‌మోహన్‌రెడ్డి కృషి చేస్తున్నారు. టీడీపీ అధినేత చంద్రబాబు రైతులకోసం అంటూ శాసనసభలో ఉత్తుత్తి అవిశ్వాస తీర్మానం పెట్టారు. తెలంగాణ ప్రాంత కాంగ్రెస్ ఎమ్మెల్యేలు ఒక్కమాట మాట్లాడలేదు. కానీ జగన్ వర్గం ఎమ్మెల్యేలు మూడు ప్రాంతాల రైతులు తమకు సమానమేనంటూ రైతులపక్షాన నిలిచి ప్రభుత్వానికి వ్యతిరేకంగా ఓటేశారు.
- జనక్ ప్రసాద్, వైఎస్సార్ కాంగ్రెస్ ఆదిలాబాద్ జిల్లా కన్వీనర్
చిరంజీవి కొత్త బిచ్చగాడిలా...
చిరంజీవి కొత్త బిచ్చగాడిలా మంత్రి పదవి అడుగుతున్నాడు. సీఎం కిరణ్, పీసీసీ అధ్యక్షుడు బొత్స, ఉపముఖ్యమంత్రి రాజనర్సింహ మధ్య సమన్వయం కుదర్చడానికి ఒకవైపు కాంగ్రెస్ అధిష్టానం తలకిందులవుతుంటే.. మరోవైపు చిరంజీవి మాత్రం మంత్రి పదవికోసం తిరుగుతున్నాడు. మంత్రి బాధ్యతలు కూడా నిర్వహించని కిరణ్ సీఎం కావడం మన దౌర్భాగ్యం.
- రోజా, వైఎస్సార్ కాంగ్రెస్ నాయకురాలు
48 గంటలపాటు నిరాహార దీక్ష చేస్తూ మా గోడు వినండని కేంద్ర, రాష్ట్ర ప్రభుత్వాలను చేతులు జోడించి వేడుకున్నా. ఇప్పటికైనా ప్రభుత్వాలు కళ్ళు తెరుస్తాయని భావిస్తున్నా. రాముడి రాజ్యం చూడలేదు కానీ వైఎస్సార్ సువర్ణయుగం మనమంతా చూశాం. వరికి మద్దతు ధర వైఎస్సార్ హయాంలో రూ. 1,200 వరకు పోయిందంటే అది సువర్ణయుగాన్నే గుర్తుచేస్తుంది. ఆ ఐదేళ్ళలో పెట్టుబడిపై ఖర్చు ఒక్క రూపాయి కూడా పెరగలేదు. 
జగన్ పిలుపు కోసం ఎదురుచూస్తున్నాం. ఆయన పిలుపిచ్చిన అరగంటలో నాతోపాటు అనేకమంది ఎమ్మెల్యేలు, ఎంపీలు పదవులు త్యాగం చేయడానికి సిద్ధంగా ఉన్నారు. కొన్ని వ్యూహాలు, సాంకేతిక కారణాల వల్లే ఇప్పటివరకూ మేం రాజీనామాలు చేయలేదు. కడప ఉపఎన్నికల అనంతరం రాష్ట్రంలో రాజకీయ పెనుతుపాను రేగనుందని నేను ముందే చెప్పాను. ఈ తుపానులో వైఎస్, జగన్‌లను విమర్శించినవారంతా కొట్టుకుపోతారు. జగన్‌తో నడుస్తున్నందువల్లే ఎప్పుడూ ఇంటిపట్టున ఉండే విజయమ్మ సైతం 40 రోజులు మండుటెండల్లో ప్రజల మధ్య తిరిగారు. ఎవరైనా ఎన్నికలు కాగానే విశ్రాంతి తీసుకుంటారు లేదా విజయోత్సవాలు జరుపుతారు. కానీ ఎన్నికల ఫలితాలకు ముందే జగన్ మళ్ళీ ఓదార్పు యాత్రకు సిద్ధమయ్యారు. అంతలోనే రైతులు ఎదుర్కొంటున్న పరిస్థితులను గమనించి రైతుదీక్షకు సిద్ధమయ్యారు. రాష్ట్రంలోనే కాదు ఈ దేశంలోనే జగన్‌కు పోటీగా నిలబడగల నాయకుడెవ రైనా కనిపిస్తున్నారా? 
ఈ ప్రభుత్వం ప్రజల విశ్వాసం కోల్పోయింది. ప్రస్తుతం రాష్ట్రంలో వైఎస్ అధికారంలోకి తెచ్చిన ప్రభుత్వాన్ని నడుపుతున్నారు. ప్రజలు తమకు అధికారం ఇవ్వలేదన్న వాస్తవాన్ని సీఎం, మంత్రులు గ్రహించాలి. ఈ ప్రభుత్వానికి మరో మూడేళ్ళ పదవీకాలం ఉంది కాబట్టి ఎమ్మెల్యేలు సహిస్తూ ఊరుకుంటున్నారు. లేదంటే అందరూ వైఎస్సార్ కాంగ్రెస్ పార్టీలోకి వచ్చేవారు. కడప గెలుపు ఒక చరిత్రాత్మక ఘట్టంగా మిగులుతుంది. వైఎస్ లేని లోటును జగన్ తీరుస్తారు. నిజాయితీగా పనిచేయడం తప్ప టక్కుటమారాలు జగన్ ముందు చెల్లవు. మహానేత వైఎస్ భోళాశంకరుడని, జగన్ శ్రీమహావిష్ణువని సాక్షాత్తు ఓ తెలంగాణ సీనియర్ కాంగ్రెస్ నేత నాతో అన్నారు. ఉప ఎన్నికల్లో జగన్‌కు 50 వేల మెజార్టీ కూడా రాదని కొందరు, లక్ష మెజార్టీ దాటదని మరికొందరు, గత మెజార్టీని మించిపోరని ఇంకొందరు కబుర్లు చెబుతూ ప్రజల్ని గందరగోళంలో పడవేశారు. ఈ నేతల దొంగమాటలు నమ్మి పందేలు కాసినవారు అన్యాయమైపోయారు. ఈ రైతు దీక్షతోనైనా కేంద్ర, రాష్ట్ర ప్రభుత్వాలు కళ్లు తెరచి రైతులకు న్యాయం చేయాలి. 
రైతు కన్నీరు పెడితే ఏ ప్రభుత్వమూ మనుగడ కొనసాగించలేదు. ఈ రైతుల కన్నీటిలో కిరణ్ ప్రభుత్వం కొట్టుకుపోతుంది. ఇటీవల వరుసగా జరిగిన ఎన్నికల ఫలితాలను విశ్లేషిస్తే చిరంజీవి, రాహుల్‌గాంధీ ఐరన్ లెగ్‌గా ముద్రపడ్డారు. ఉత్తరప్రదేశ్‌లో రైతు సమస్యల పట్ల పోరాడుతున్న రాహుల్.. కాంగ్రెస్ అధికారంలో ఉన్న రాష్ట్రాల్లో రైతాంగం తీవ్ర దుర్భిక్ష పరిస్థితులను ఎదుర్కొంటున్న విషయాన్ని ముందు తెలుసుకోవాలి. తాము అధికారంలో ఉన్న చోట్ల సంస్కరణలు అమలు చేయడం మానేసి, ప్రతిపక్షాలు అధికారంలో ఉన్న చోట్ల ఆందోళన చేయడం ఎంతవరకు సబబు? కడప అఖండ విజయాన్ని కొంతమంది కాంగ్రెస్ నేతలు పాలపొంగుగా అభివర్ణించారు. అందులో ఉన్నది గిన్నెడు పాలు కాదు. సప్తసముద్రాలంత అభిమానం జగన్‌పై ఉంది. కడపలో జనం ఓట్లతో ఈవీఎం కుయ్‌మంటుంటే అక్కడ ఢిల్లీలో అధిష్టానం గూబ గుయ్యిమంది. 
కడపలో జగన్ మెజార్టీ చూస్తుంటే.. ఆయనకు ప్రజల్లో ఎంతటి ఆదరణ ఉందో అర్థమవుతోంది. రాష్ట్రానికి సంబంధించి లోక్‌సభ ఎన్నికల మెజార్టీలో దివంగత ప్రధాని పీవీ నరసింహారావు మొదటి స్థానంలో ఉన్నప్పటికీ ఆ విజయం లెక్కలోనిది కాదు. అప్పట్లో పీవీపై ఎన్టీఆర్ అభ్యర్థిని నిలబెట్టలేదు. జగన్‌కు రాష్ట్రానికి సీఎంగానే కాదు.. దేశానికి ప్రధాని కాగల లక్షణాలున్నాయి. వైఎస్సార్ కాంగ్రెస్ పార్టీకి బలమైన పట్టు కలిగిన గుంటూరు జిల్లాలో వచ్చే ఎన్నికల్లో 17 స్థానాల్లోనూ ప్రజలు పట్టం కడ తారు.
చావడానికి సిద్ధంగా ఉన్న కాంగ్రెస్ పార్టీని తన పాదయాత్ర ద్వారా జవసత్వాలు తెచ్చిన నేత వైఎస్. అలాంటి మహానేత దేశంలో ఏ నాయకుడూ ప్రవేశపెట్టని విధంగా పేదల సంక్షేమం కోసం ఏర్పాటు చేసిన పథకాలకు ప్రస్తుత ప్రభుత్వం తూట్లు పొడుస్తోంది. కాంగ్రెస్‌ను కూకటివేళ్ళతో పెకలించాలి. ప్రజాసమస్యలపై, రైతు సమస్యలపై ఎలాంటి అవగాహన లేని సీఎం మనల్ని పాలించడం మన ఖర్మ. వైఎస్ తర్వాత రైతుల్ని పట్టించుకునే నాథుడే కరువయ్యాడు. నాగళ్ళనే తుపాకులను చేసి మీ ఓటుతో ఈ ప్రభుత్వానికి, కాంగ్రెస్‌కు చరమగీతం పాడి జగన్ సీఎం అయ్యేదాకా అండగా నిలవండి.
వైఎస్ వారసుడు జగన్ మాత్రమేనని కడప ఓటర్లు నిరూపించారు. రైతు దీక్షకు ఢిల్లీపెద్దలు తమ వేగుల్ని పంపి ఉంటారు. ఈ వేగుల ద్వారా అయినా రైతు గుండెచప్పుడు ఢిల్లీకి తెలుస్తుంది. కడప జిల్లాలోని తిరుమలదిన్నెలో ఓ నాలుగేళ్ల పాప మంత్రి డీఎల్ రవీంద్రారెడ్డి వస్తున్నారంటే ఎవడైతే నాకేంటి? జై జగనన్న అని నినాదం చేసిందంటే జగన్ ఎంతలా ప్రజల గుండెల్లో ఉన్నారో అర్థమవుతుంది. దమ్ముంటే కాంగ్రెస్ నేతలు సోనియా బొమ్మ పెట్టుకుని ప్రజల్లోకి వెళ్లాలి. 
జగన్ కోసం మంత్రి పదవులు వదులుకోవడానికి పదుల సంఖ్యలో ఎమ్మెల్యేలు, ఎంపీలు ఉన్నారు. సీఎం కిరణ్‌కోసం మంత్రి పదవి వదులుకోవడానికి కేబినెట్‌లో ఎవరైనా సిద్ధంగా ఉన్నారా? ఈ ప్రభుత్వం వెన్నెముక లేని సర్కారు. దీన్ని కూల్చడం జగన్‌కు ఒక లెక్కకాదు. వీహెచ్, శంకరరావులు కాంగ్రెస్‌ను అథఃపాతాళానికి నెట్టడానికి శాయశక్తులా కృషిచేస్తున్నారు. కాంగ్రెస్ పార్టీ ముత్యంలాంటి పార్టీ. అయితే జగన్ వెళ్లిపోయిన తర్వాత ముత్యం వెళ్లిపోయింది. ప్రస్తుతం చిప్పే మిగిలింది. ఏ జాదూ వచ్చినా కాంగ్రెస్‌ను మార్చలేరు.
రైతు సంక్షేమం కోసం ఎన్నో పథకాలను ప్రవేశపెట్టిన వైఎస్‌ను చూసి దేశం ఎంతో నేర్చుకుంది. వైఎస్ పంచె కట్టుకుని వస్తుంటే రైతుకు నిజమైన ప్రతినిధిలా ఉండేవారు. ఇప్పుడు రాష్ట్రంలో రైతును పట్టించుకునే నాథుడే లేడు. సినిమా రంగం నుంచి వచ్చిన ఓ నేత సామాజిక సేవ అంటూ ప్రజలకు ఎన్నో ఆశలు కల్పించి కేవలం పదవి కోసం పార్టీని నట్టేట ముంచి నీచమైన కాంగ్రెస్ చుట్టూ తిరుగుతున్నారు. టీడీపీ ఒక్క ప్రాజెక్టు కట్టకుండా రాష్ట్ర వ్యవసాయ రంగాన్నే దివాళా తీయించింది. మళ్లీ అప్పటి వైఎస్ పాలనను తీసుకురాగ ల వ్యక్తి జగన్ ఒక్కడే. 
ఫీజు పోరులో మూడోరోజూ అదే జోరు. ఆదివారం ఆంధ్రా, నాగార్జున, వెంకటేశ్వర, శ్రీకృష్ణదేవరాయ, కాకతీయ, ఉస్మానియా యూనివర్సిటీల నుంచి వందలాది విద్యార్థులు పెద్ద సంఖ్యలో తరలివచ్చారు. వారిలో కొందరు జగన్‌కు సంఘీభావం ప్రకటించి దీక్షలో కూర్చున్నారు. చంకన చంటిపిల్లాడిని వేసుకొని వచ్చిన మహిళలు, ఊతకర్ర సాయంతో ఉత్సాహంగా వచ్చిన వృద్ధులు... దీక్షార్ధి అయిన యువనేతలో తమ తమ్ముడిని, అన్నను, తనయుడిని చూసుకొని కంటతడి పెట్టారు. మూడు రోజులుగా ఆహార పానీయాల్లేక శుష్కించిన యువకిశోరంపై వాత్సల్యాన్ని కురిపించారు. మొండివైఖరి అవలంబిస్తున్న ప్రభుత్వం వెంటనే దిగిరావాలంటూ పెద్దపెట్టున నినదించారు. 
ఏకబిగిన 72 గంటలుగా దీక్షలో ఉన్న జగన్ ఆదివారం కాసింత నీరసంగా కన్పించడంతో అందరిలోనూ ఆందోళన నెలకొంది. ఓ వైపు నీరసం కమ్ముకొస్తున్నా.... నిజమైన నాయకుడిగా తనను చూసేందుకు వచ్చిన ప్రజలను ఆప్యాయంగా పలకరించేందుకు జగన్ ప్రయత్నించారు. క్యూలైన్‌లో పరామర్శించే వీలులేనంత సంఖ్యలో ప్రజలు రావడంతో జగన్ తానే లేచి నిలబడి పలుసార్లు ప్రజలందరికీ అభివాదం చేశారు. ఈ సమయంలో ప్రజల నుంచి జయ జయ ధ్వానాలు మిన్నుముట్టాయి. సుదూరం నుంచి వచ్చిన మహిళా అభిమానులకు మాత్రం ప్రత్యేక క్యూ లైన్ ద్వారా దీక్షా శిబిరం వేదిక వద్దకు వెళ్లేందుకు అవకాశం క ల్పించారు. అయితే... యువనేత ఆరోగ్య పరిస్థితిపై ప్రభుత్వం ఎటువంటి వాకబు చేయకపోవడంపై మహిళలు, విద్యార్థుల నుంచి తీవ్ర ఆగ్ర హం వ్యక్తమైంది.
‘‘వైఎస్ చనిపోయిన ఏడాదిన్నర తర్వాత కూడా రాష్ట్రంలో ఆయనలేని లోటు స్పష్టంగా కనపడుతోంది. పేద విద్యార్థుల ఫీజు కోసం నడిరోడ్డు మీద ధర్నాలు చేయాల్సిన దుస్థితి ఏర్పడింది. పేద విద్యార్థుల ఉన్నత విద్య కోసం ఫీజులు కడతామని ఎన్నికల ముందు ఇచ్చిన వాగ్దానాలను నిలుపుకోలేని వారు... జగన్ దీక్షను విమర్శించే ముందు గుండెలపై చేయి వేసుకుని ఆత్మ విమర్శ చేసుకోవాలి’’ అని మాజీ మంత్రి కొండా సురేఖ వ్యాఖ్యానించారు. ‘ఫీజుపోరు’ దీక్షాస్థలి వద్ద ఆదివారం విద్యార్థులు సురేఖ మాట్లాడాలని గొడవ చేయడంతో వారినుద్దేశించి ఆమె ప్రసంగించారు. సంక్షేమపథకాలను అమలుచేసే సత్తా లేకపోతే తప్పయిందని ఒప్పుకోవాలే కానీ వైఎస్‌ను అభాసుపాలు చేయాలని ప్రయత్నిస్తే సహించేదిలేదని హెచ్చరించారు. జగన్ మాత్రమే వైఎస్ ఆశయాలను ముందుకు తీసుకెళ్లగలరని చెప్పారు. భూమి, ఆకాశం ఉన్నంతకాలం వైఎస్ రాష్ట్ర ప్రజల హృదయాల్లోనే ఉంటారన్నారు. ఈజిప్టు తరహాల్లో ప్రభుత్వాన్ని పడవేసే అవకాశం ప్రజలు తీసుకోకుండా చూసుకోవాల్సిన బాధ్యత ప్రభుత్వంపై ఉందని సూచించారు. 
తమ సమస్యల కోసం ఆందోళన చేస్తున్న యువనేత జగన్‌కు విద్యార్థి లోకం అండగా నిలవాలని బీకాం విద్యార్థిని ప్రశాంతి కోరింది. ఆదివారం ఫీజుపోరు దీక్షాశిబిరానికి తన తల్లిదండ్రులతో కలిసి వచ్చిన ఆమె జగన్‌కు సంపూర్ణ మద్దతు ప్రకటించింది. ఈ సందర్భంగా ప్రశాంతి మాట్లాడిన తీరు అందరినీ ఆకట్టుకుంది. ‘వైఎస్సార్ ప్రభుత్వం ఉన్నప్పుడు నాలాంటి పేద విద్యార్థులు ఎంతో లబ్ధి పొందారు. ఆయన చనిపోయిన తర్వాత రోశయ్య, కిరణ్‌కుమార్‌రెడ్డి ప్రభుత్వాల్లో నేనేమి పొందానంటే.. ఏమీ లేదు. అసలు ఈ ప్రభుత్వం గురించి చెప్పుకోవడానికి ఏమీ లేదు. ఈ ప్రభుత్వమే బాగుంటే ఫీజుపోరుకు నేను వచ్చే అవకాశమే ఉండేది కాదు. అందుకే మన సమస్యల పరిష్కారానికి విద్యార్థులంతా జగన్‌కు అండగా నిలవాలి’ అంటూ ఉద్వేగంగా మాట్లాడింది. జగన్‌కు అండగా నిలబడతామని ఇక్కడే మాట ఇవ్వాలని అంటూ.. ‘జగన్‌కు అండగా ఉంటారా లేదా’ అని ప్రశాంతి ప్రశ్నించడంతో అక్కడ ఉన్న విద్యార్థులంతా ‘జై జగన్’ అని నినదించారు. జగనన్న ఒంటరికాదని, తామంతా ఆయనకు అండగా ఉన్నామని ప్రశాంతి చెప్పింది. 
